Er að gera upp Victoria KR 26, árgerð 1953. Hjólið er 250cc tvígengishjól framleitt af Victoria Werke Nurnberg sem framleiddi þessi hjól á árunum 1953-1956. Victoria Werke var stofnað 1886 og hóf framleiðslu mótorhjóla 1901. Fyrirtækið framleiddi mótorhjól allt fram til 1958 þegar það sameinaðist Express og DKW og úr varð Zweirad Union. Framleiðslu undir merkjum Victoria var þó haldið áfram en merkið endanlega lagt af árið 1968.
Mig hefur lengi langað til að gera upp gamalt mótorhjól en einhvern vegin aldrei látið verða af því. Síðastliðið vor datt ég niður á þennan grip og ákvað að láta slag standa. Hjólið var allt sundurtekið, ýmislegt vantaði og þarfnaðist endurnýjunar.
Fyrsta verkefnið var að útvega sér viðgerðarbók um hjólið og finna út hvað það væri sem þyrfti að kaupa. Þurfti svo að leggja hjólið til hliðar yfir sumarið þar sem annað verkefni beið mín. Notaði þó sumarið í varahlutaleit, bæði með grúski á ýmsum varahlutasíðum og með reglulegum heimsóknum á þýska ebay. Náði mér m.a. í bensíngjöf, blöndung, teina og pakkingasett, auk þess sem ég keypti "slátur" úr öðru hjóli. Samhliða þessu hugleiddi ég töluvert hvernig rétt væri að gera hjólið upp. Var ekki nógu ánægður með upprunalega litinn og ákvað því að mála það í öðrum lit. Vildi jafnframt halda í söguna og láta hjólið halda mörgum af þeim örum sem það hafði safnað í gegnum tíðina. Með þetta að leiðarljósi hófst eiginleg uppgerð upp úr miðjum ágúst. Byrjaði á því að púsla helstu hlutum á hjólið til að sjá betur hvernig allt gengi saman.
Tók svo hjólið sundur aftur og byrjaði málningarvinnunna. Fyrst var grindin sprautuð svört og svo tankur, bretti o.fl. sprautuð hvít og blá. Eftir rúmlega 6 vikna törn í málningarvinnu var loks hægt að snúa sér að mótornum. Mótorinn gekk nokkuð auðveldalega saman enda einfaldur að uppbyggingu. Á þó enn eftir að klára hann þar sem ég bíð eftir stimpli o.fl. Á meðan fór ég í demparana og þar er ég staddur núna.
Í dag lítur hjólið svona út.
Næsta verkefni er svo að teina upp gjarðirnar.
Meira síðar.....
Það verður gaman að fylgjast með þessu verkefni hjá þér Baldur! Athygglisverð ákvörðun hjá þér að leyfa "örum" hjólsins að halda sér. Bara gaman að því. 
